លោកឧញ៉ា ពុង ឃាវសែ សម្រេចផ្ដល់អាហារូបករណ៍មិនបង់ថ្លៃសិក្សា១០០% ចំនួន ៣៥ កន្លែង សម្រាប់ការសិក្សាមួយចប់ថ្នាក់បរិញ្ញាបត្រលើជំនាញ STEM

រាជធានីភ្នំពេញ ៖ ដើម្បីរួមចំណែកជាមួយនិង ក្រសួងអប់រំ យុវជន និងកីឡា ក្នុងការអភិវឌ្ឍធនធានមនុស្ស ជាពិសេសការពង្រឹងគុណភាពវិស័យអប់រំវិទ្យាសាស្រ្ដ និងបច្ចេកវិទ្យា ឲ្យសម្រេចបានតាមគោលដៅអភិវឌ្ឍន៍ប្រកបដោយចីរភាពឆ្នាំ២០៣០ ស្ដីពីការអប់រំនៅកម្ពុជា ក៏ដូចជាការគាំទ្រគោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ ក្នុងឆ្នាំសិក្សា ២០២១-២០២២ នេះ លោកឧញ៉ា ពុង ឃាវសែ ប្រធានក្រុមប្រឹក្សាភិបាល សាកលវិទ្យាល័យបច្ចេកវិទ្យា​ និងវិទ្យាសាស្ដ្រកម្ពុជា (Cam Tech) បានសម្រេចផ្ដល់អាហារូបករណ៍មិនបង់ថ្លៃសិក្សា១០០% ចំនួន ៣៥ កន្លែង សម្រាប់ការសិក្សាមួយចប់ថ្នាក់បរិញ្ញាបត្រលើជំនាញ STEM។

ក្នុងលិខិតមួយច្បាប់ផ្ញើជូន ឯកឧត្តមបណ្ឌិតសភាចារ្យ ហង់ជួន ណារ៉ុង បានគូសបញ្ជាក់ ចំពោះអាហារូបករណ៍១០០% ដែលសាកលវិទ្យាល័យបច្ចេកវិទ្យា​ និងវិទ្យាសាស្ដ្រកម្ពុជា (Cam Tech) ផ្តល់ជូនសិស្ស និស្សិតមានដូចជា៖

១. អាហារូបករណ៍សម្រាប់ស្ដ្រីលើជំនាញ STEM ចំនួន ១០ កន្លែង

២.​ អាហារូបករណ៍សមធម៌សម្រាប់សិស្សមកពីបណ្ដាខេត្ដ ចំនួន ១០ កន្លែង

៣. អាហារូបករណ៍សម្រាប់សិស្សទូទៅចំនួន ១៥ កន្លែង។

ចំពោះមុខជំនាញឯកទេសដែលត្រូវសិក្សាមាន៖ វិស្វកម្មរ៉ូបូត និងស្វ័យប្រវត្ដិកម្ម, សន្ដិសុខតាមប្រព័ន្ធអ៊ីនធឺណិត, វិទ្យាសាស្រ្ដនិន្នន័យនិងបញ្ញាសិប្បនិម្មិត, បច្ចេកទេសអប់រំ, ស្ថាបត្យកម្ម និងការរចនាផ្នែកខាងក្នុង។

ជាមួគ្នានោះចំពោះលក្ខខណ្ឌនៃការផ្ដល់អាហារូបករណ៍ បេក្ខជន និងបេក្ខនារីត្រូវបំពេញដូចជា៖

១. ជាជនជាតិខ្មែរ

២. បានបញ្ចប់មធ្យមសិក្សាទុតិយភូមិ (និទន្ទេសទាបបំផុត D)

៣. មានអាយុមិនលើសពី ២៥ ឆ្នាំ

៤. បានឆ្លងកាត់ការប្រឡងជ្រើសរើស និងសម្ភាសជាប់នៅសាកលវិទ្យាល័យខេមតិច

និង៥. មានការប្ដេជ្ញាចិត្ដជានិស្សិតពេញម៉ោង និងចូលរួមកម្មវិធីហាត់ការងារ។

ដើម្បីដាក់ពាក្យស្នើសុំបេក្ខជន និងបេក្ខនារី ត្រូវអនុវត្ដដូចខាងក្រោម៖ ចុចតំណភា្ជប់់

Application Form

 បន្ទាប់មកបំពេញព័ត៌មានឲ្យបានត្រឹមត្រូវ និងភ្ជាប់មកជាមួយ (upload) នូវតម្រូវការឯកសារមួយចំនួន ភ្ជាប់មកជាមួយ (upload) វីដេអូមានរយៈពេល ០៣នាទី ជាភាសាអង់គ្លេស (ធ្វើជា -MP4 និងផ្ដល់តំណភ្ជាប់វីដេអូ ដែលបាន upload ក្នុង YouTube ។