ឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា បានសំណេះសំណាលលើកទឹកចិត្ត ក្រើនរំឭកឱ្យក្រុមកីឡាករ កីឡាការិនីជម្រើសជាតិវ៉ូវីណាម ខិតខំហ្វឹកហាត់ និងគោរពវិន័យឱ្យបានខ្ជាប់ខ្ជួន

រាជធានីភ្នំពេញ ៖ ឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា បានសំណេះសំណាលលើកទឹកចិត្ត ក្រើនរំឭកឱ្យក្រុមកីឡាករ កីឡាការិនីជម្រើសជាតិវ៉ូវីណាម ខិតខំហ្វឹកហាត់ និងគោរពវិន័យឱ្យបានខ្ជាប់ខ្ជួន នៅពហុកីឡ ដ្ឋានជាតិមរតកតេជោ ដែលត្រូវហ្វឹកហាត់បិទខ្ទប់នៅទីនេះ។

ឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា បានលើកទឹកចិត្តឱ្យកីឡាករ កីឡាការិនីជម្រើសជាតិកីឡាវ៉ូវីណាមឱ្យខិតខំការហ្វឹកហាត់ឱ្យបានល្អប្រសើរ ដើម្បីត្រៀមចូលរួមប្រកួតប្រជែងស៊ីហ្គេម ចំពោះមុខ គឺស៊ីហ្គេម លើកទី៣១ នៅប្រទេសវៀណាម នាខែមេសា-ឧសភា ឆ្នាំ២០២២ និងស៊ីហ្គេម លើកទី៣២ ឆ្នាំ២០២៣ នៅព្រះរាជាណាចក្រកម្ពុជា។ ជាមួយគ្នានោះ ឯកឧត្តមក៏បានក្រើនរំឭកដល់អត្តពលិកទាំងអស់ ដែលត្រូវត្រៀមលើវិញ្ញាសាប្រយុទ្ធត្រូវថែរក្សាទម្ងន់ កុំឱ្យឡើងទម្ងន់។ ចំពោះអ្នកដែលត្រូវប្រកួតវិញ្ញាសាសម្តែង ក៏ត្រូវបានឯកឧត្តមជំរុញឱ្យពួកគេប្រឹងប្រែងហ្វឹកហាត់ឱ្យបានមុះមុតដូចគ្នា ដើម្បីបង្កើនគុណភាពបច្ចេកទេសទៅចូលរួមប្រកួតប្រជែងមេដាយ ក្នុងនាមជាប្រភេទកីឡាសក្តានុពលរបស់កម្ពុជា។ ក្រៅពីគោលដៅបង្កើនបច្ចេកទេស ក៏ប្រធានសហព័ន្ធវ៉ូវីណាមរូបនេះបាន ផ្តល់ការណែនាំជាថ្មីឱ្យក្រុមជម្រើសជាតិទាំងអស់ត្រូវគោរពវិន័យ ក្រមសីលធម៌ឱ្យស័ក្តិសមជាក្រុមជម្រើស ជាតិ ហើយក៏ត្រូវគោរពតាមវិធានការសុខាភិបាល ៣កុំ ៣ការពារ ឱ្យបានខ្ជាប់ខ្ជួនបំផុតដោយចាប់ផ្តើមចេញពីខ្លួនឯងម្នាក់ៗនេះហើយ។

ឯកឧត្តម បន្តថា ត្រូវព្យាយាមហ្វឹកហាត់ឱ្យល្អ រួមទាំងការគោរពវិន័យឱ្យបានល្អ។ កីឡាករ ដែលល្អ គឺត្រូវភ្ជាប់ជាមួយនឹងវិន័យល្អដែរ ដោយវិន័យនេះហើយនាំឱ្យយើងល្អ និងមានកិត្តិយស។ បើយើងអត់មានវិន័យទេ គេមិនអាចលើកយើងរួចដែរ ព្រោះតម្លៃជាកិត្តិយស។ ប្រសិនបើកីឡាករម្នាក់មានទេពកោសល្យ និងមានសមត្ថភាពហើយ រឿងអី មិនអាចគោរពវិន័យបាន ដូច្នេះហើយ បើកីឡាករ ឬកីឡាការិនីម្នាក់ៗមិនមានវិន័យ អ្នកពិបាកចិត្តជាងគេ គឺគ្រូបង្វឹក ហើយថ្នាក់ដឹកនាំសហព័ន្ធក៏ត្រូវបានគេសួរនាំផងដែរ ។

ឯកឧត្តម អ៊ូ រតនា ក៏បានកោតសរសើរដល់ការប្រឹង ប្រែងរបស់ក្រុមជម្រើសជាតិខ្លួនផងដែរ ដែលខំហ្វឹកហាត់ និងប្រកួតដណ្តើមមេដាយពីព្រឹត្តិការណ៍អន្តរជាតិជាបន្ត បន្ទាប់មកជូនជាតិមាតុភូមិ។

សូមបញ្ជាក់ថា ក្រុមជម្រើស ជាតិវ៉ូវីណាមកម្ពុជា មានកីឡាករ ១៩នាក់ និងកីឡាការិនី ១០នាក់ (សរុប២៩ នាក់) ក្រោមការឧបត្ថម្ភគាំទ្រពីក្រសួងអប់រំ យុវជន និង កីឡា តាមរយៈមជ្ឈមណ្ឌលជាតិហ្វឹកហ្វឺនកីឡា និងគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC)។ នេះជាការហ្វឹកហាត់បិទខ្ទប់របស់ក្រុម ជម្រើសជាតិវ៉ូវីណាម ខណៈប្រភេទកីឡាផ្សេងៗទៀត សរុប២០ប្រភេទកីឡា ក៏បានហ្វឹកហាត់បិទខ្ទប់នៅពហុកីឡ ដ្ឋានជាតិមរតកតេជោនេះដែរ ដើម្បីត្រៀមចូលរួមប្រកួត ប្រជែងមេដាយ នៅក្នុងព្រឹត្តិការណ៍ប្រកួតកីឡាស៊ីហ្គេម លើកទី៣១ នៅប្រទេសវៀតណាម នាឆ្នាំ២០២២ ខាងមុខ៕