សិក្ខាសាលាតម្រង់ទិសស្តីពី ការគ្រប់គ្រងក្របខ័ណ្ឌអនុវត្តការជំរុញបង្កើតការងារថែទាំសុខភាពបឋម នៅខេត្តកណ្តាល

ខេត្តកណ្តាល៖ រសៀលថ្ងៃទី២៥ ខែមិថុនា ឆ្នាំ២០២៤ រដ្ឋបាលខេត្តកណ្តាល បានរៀបចំសិក្ខាសាលាតម្រង់ទិស”ស្តីពី៖ការគ្រប់គ្រងក្របខ័ណ្ឌអនុវត្តការជំរុញបង្កើនការថែទាំសុខភាពបឋម(PHC – BIF) ក្រោមអធិបតីភាព ឯកឧត្តម ប្រាក់ សារ៉ាត អភិបាលរងខេត្តកណ្តាល ។

ក្នុងសិក្ខាសាលានេះ ឯកឧត្តម ប្រាក់ សារ៉ាត អភិបាលរងខេត្តកណ្តាល បានមានប្រសាសន៍ថា៖រាជរដ្ឋាភិបាលកម្ពុជា ជានិច្ចកាលបានចាត់ទុកការលើកស្ទួយស្ថានភាពសុខភាពប្រជាពលរដ្ឋកម្ពុជាគ្រប់រូប ជាអាទិភាពខ្ពស់ ដែលមានឆន្ទះដ៏មុតស្រួច លើកស្ទួយការងារសង្គមក្នុងវិស័យសុខាភិបាល ដើម្បីឆ្លើយតបតាមតម្រូវការ ជាក់ស្តែង និងគុណភាពវិស័យសុខាភិបាល ក្នុងការឈានទៅសម្រេចគោលដៅយុទ្ធសាស្រ្តការព្យាបាលប្រកបដោយ គុណភាព ប្រជាពលរដ្ឋទទួលបាននូវសេវាសុខភាពគ្រប់ជ្រុងជ្រោយ មានគុណភាព សុវត្ថិភាព និងប្រសិទ្ធភាព។

ឯកឧត្តមបន្តថា៖ ផែនការយុទ្ធសាស្ត្រសុខាភិបាល គឺប្រតិបត្តិប្រពន្ធ័សុខាភិបាលឱ្យកាន់តែមានប្រសិទ្ធិភាព ជាពិសេសផ្តោត លើការផ្តល់សេវាថែទាំសុខភាពមានគុណភាព សុវត្ថិភាព ស័ក្តិសិទ្ធភាព និងសមធម៌ ជូនប្រជាពលរដ្ឋទូទៅ ដោយ មិនប្រកាន់និន្នាការនយោបាយ។ ជាការឆ្លើយតបទៅទស្សនៈទាននេះ រដ្ឋបាលខេត្តពិនិត្យឃើញថា មន្ត្រីសុខាភិបាល នៅទូទាំងខេត្ត បាននឹងកំពុងធ្វើសកម្មភាពផ្តល់សេវាយ៉ាងសកម្មនៅគ្រប់មូលដ្ឋានសុខាភិបាលសាធារណៈទាំងអស់ រួមមាន៖ មន្ទីពេទ្យបង្អែកខេត្ត ស្រុក មណ្ឌលសុខភាព និងប៉ុស្តិ៍សុខភាព និងមានមន្ត្រីសុខាភិបាល នៅគ្រប់លំដាប់ ថ្នាក់ ព្រមទាំងសំភារៈបរិក្ខា ដើម្បីគាំទ្រការផ្តល់សេវាសុខភាពជូនប្រជាពលរដ្ឋ មានលក្ខណៈល្អប្រសើរស្របទៅតាម គោលនយោបាយរបស់ក្រសួងសុខាភិបាល ដែលបានកំណត់ទៅ តាមកម្មវិធីនីមួយៗ មានដូចជា៖ កម្មវិធីសុខភាព បន្តពូជ មាតាទារក និងកុមារ កម្មវិធីប្រយុទ្ធនឹងជំងឺឆ្លង អេដស៏ របេង គ្រុនចាញ់ គ្រុនឈាម ជំងឺឆ្លងដ៏ទៃទៀត កម្មវិធីប្រយុទ្ធនឹងជំងឺមិនឆ្លង និងបញ្ហាសុខភាពសាធារណ: ដ៏ទៃទៀតទទួលបានលទ្ធផលល្អប្រសើរ ។

ឯកឧត្តមបានផ្តល់នូវការក្រើនរំលឹកជាច្រើន ក្នុងនោះបានជំរុញដល់អាជ្ញាធរមូលដ្ឋានគ្រប់លំដាប់ថ្នាក់ ត្រូវផ្តល់កិច្ចសហការល្អ ក្នុងកិច្ចដំណើរការផ្តល់សេវាសុខាភិបាល ដល់ប្រជាជននៅទូទាំងខេត្ត ពិសេសលើការងារបន្ទាន់ផ្នែកសុខាភិបាលដែលជាតម្រូវការ ។

ឯកឧត្តមបន្ថែមថា៖ វិស័យសុខាភិបាលត្រូវត្រៀមជាស្រេចឱ្យបានទាន់ពេលវេលា មុនពេលបញ្ហាសុខភាពមកដល់ និងត្រូវចាប់យកឱកាសនានា ដូចជាដំណើរការវិមជ្ឈការ និងវិសហមជ្ឈការ នវានុវត្ត បរិវត្តកម្មឌីជីថល នៅក្នុងប្រទេស ទំនាក់ទំនងរវាងថ្នាក់ជាតិ និងសកលលោក ដើម្បីជម្រុញការថែទាំសុខភាពបឋម ដែលជាជម្រើសដំបូងប្រកបដោយ គុណភាព រវាងប្រជាជន និងប្រព័ន្ធសុខាភិបាលឱ្យកាន់តែជឿនលឿនក្នុងប្រទេសកម្ពុជា។ ផែនការយុទ្ធសាស្ត្រឆ្នាំ ២០២៣-២០៣៣ បានផ្តោតការយកចិត្តទុកដាក់បន្ថែមទៀតលើការថែទាំសុខភាពបឋម ដែលជាមូលដ្ឋានគ្រឹះនៃ ប្រព័ន្ធសុខាភិបាល ដើម្បីឈានឆ្ពោះទៅសម្រេចបាននូវការគ្របដណ្តប់សុខភាពជាសកល ។ ដូចនេះចាំបាច់ត្រូវ ជម្រុញការថែទាំសុខភាពបឋមបន្ថែម តាមរយៈការបង្កើនការទទួលខុសត្រូវ និងគណនេយ្យភាពរបស់អាជ្ញាធរមូលដ្ឋាន អ្នកពាក់ព័ន្ធ និងសហគមន៍ទាំងមូល ក្នុងការដោះស្រាយកត្តាសង្គមដែលកំណត់បញ្ហាសុខភាព ការលើកកម្ពស់សុខភាព ទប់ស្កាត់ និងបង្ការជំងឺ និងការលើកកម្ពស់គុណភាពសេវាសុខភាព ព្រមទាំងជម្រុញ ការប្រើប្រាស់ សេវាសុខភាពទាន់ពេលវេលា៕