ភ្នំពេញ៖ ខុនដូ មុីឡាន កុងគ័ន ស្ថិតនៅតាមផ្លូវណតរ៍ប៊្រីត សង្កាត់ទឹកថ្លា ខណ្ឌសែនសុខ រាជធានីភ្នំពេញជាសំបុកល្បែងសុីសងខុសច្បាប់ដ៏ធំមួយកន្លែងដែលមានបៀរអុងឌូ សុីគូថៃ និងល្បែងផ្សេងទៀតដ៏ធំកំពុងត្រូវបានក្រុមអ្នកញៀនល្បែងលេងភ្នាល់ដាក់ប្រាក់ចាញ់ឈ្នះរាប់ពាន់ដុល្លារដែលមានឈ្មោះ ប៊ូ សុខេន ហៅ ចែមុំ ជាមេខ្លោង កំពុងតែបើកដំណើរការយ៉ាងរលូន ខណៈអាជ្ញាធរមានសមត្ថកិច្ចមិនចុះបង្ក្រាបនៅឡើយនោះទេ។ នេះបើតាមប្រភពដែលបណ្ដាញសារព័ត៌មានទើបទទួលបាននៅថ្ងៃទី២៥ ខែឧសភា ឆ្នាំ២០២៣។
ប្រភពព័ត៌មានបានបន្តថា ទីតាំងខាងលើនេះ ត្រូវបានប្រភពបញ្ជាក់ប្រាប់ថា គេលេងល្បែងបៀរអុងឌូ ក្នុង១ទឹកចាប់១០ម៉ឺនរៀលឡើងទៅ និងមានល្បែងផ្សេងទៀត មានទាំងជនជាតិចិនផងដែរ។
ប្រភពបានទៀតបញ្ជាក់ថា ទីតាំងល្បែងសុីសងក្នុងខុនដូ មុីឡាន កុងគ័ន គឺគេលេងនៅជាន់ទី៦ ដោយអនុញ្ញាតឲ្យអ្នកលេងដាក់ឡាននិងម៉ូតូ នៅកន្លែងផ្សេងគ្នា ឬជិះម៉ូតូកង់បីមកលេង ដោយបន្លំភ្នែកសមត្ថកិច្ច ធ្វើដូចជាស្ងប់ស្ងាត់ណាស់។ ប៉ុន្តែខាងក្នុងវិញគឺកំពុងលេងល្បែងយ៉ាងគគ្រឹកគ្រេង។ ចំពោះអ្នកចេញចូលត្រូវតែមានកាតឡើងជណ្តើរយន្តនិងជនប្លែកមុខ ឬមិនសូវស្គាល់ច្បាស់ គេមិនអនុញ្ញាតឲ្យយកទូរសព្ទដៃចូលនោះទេ។
ទាក់ទិនករណីលេងល្បែងស៊ីសងខាងលើនេះ រាជរដ្ឋាភិបាលកាលពីថ្ងៃទី១៦ ខែកញ្ញា ឆ្នាំ២០២២ បានសម្រេចបង្កើតក្រុមការងារបង្រ្កាបការលេងល្បែងស៊ីសងខុសច្បាប់គ្រប់ប្រភេទ។ ក្រុមការងារមួយនេះមានតួនាទីភារកិច្ចដូចជា រៀបចំផែនការ វិធានការ គោលការណ៍ណែនាំ ដើម្បីឱ្យអាជ្ញាធរមានសមត្ថកិច្ចគ្រប់លំដាប់ថ្នាក់អនុវត្តបង្រ្កាប នូវរាល់ការលេងល្បែងស៊ីសងខុសច្បាប់គ្រប់ប្រភេទ សហការជាមួយអាជ្ញាធរ មានសមត្ថកិច្ចទាំងនៅថ្នាក់ជាតិ រដ្ឋបាលថ្នាក់ក្រោមជាតិ ដើម្បីធ្វើការស្រាវជ្រាវ និងចាត់វិធានការបង្រ្កាបនូវទីតាំងលេងល្បែងស៊ីសងខុសច្បាប់ ចាត់វិធានការឱ្យស៊ើបអង្កេតស្រាវជ្រាវរកអត្ថិភាពនៃបទល្មើសជួញដូរមនុស្ស ជួញដូរកម្លាំងពលកម្ម អាជីវកម្មផ្លូវភេទ និងបទល្មើសសម្អាតប្រាក់ ព្រមទាំងបទល្មើសផ្សេងៗទៀត ដែលបានប្រព្រឹត្តនៅក្នុងទីតាំង លេងល្បែងស៊ីសងខុសច្បាប់ទាំងនោះ ដើម្បីសហការចាត់វិធានការ បង្រ្កាបបទល្មើសទាំងនោះតាមច្បាប់ជាធរមាន។
ទាក់ទិនករណីនេះដែរ សាធារណៈជនបានអំពាវនាវដល់អាជ្ញាធរក្រុងភ្នំពេញសុំមានវិធានការផ្លូវច្បាប់ ចំពោះបនល្បែងស៊ីសងដ៏ធំខាងលើនេះផង។
ជុំវិញការចុះផ្សាយព័ត៌មានខាងលើនេះ អង្គភាពសារព័ត៌មាន យើង នឹងរងចាំការបកស្រាយគ្រប់ភាគី ពាក់ព័ន្ធនិងម្ចាស់ទីតាំងល្បែងស៊ីសងខាងលើនេះ រៀងរាល់ម៉ោងធ្វើការ៕
