ខេត្តកំពង់ធំ ៖ អតីតយុទ្ធជន កាន់តែមានជីវភាពប្រសើរឡើង បន្ទាប់ពីទទួលបានដីសម្បទានសង្គមកិច្ចរបស់រាជរដ្ឋាភិបាល ដើម្បីអាចរស់នៅ ប្រកបមុខរបរ និងដាំដុះដំណាំផ្សេងៗ។
ឯកឧត្តមទេសរដ្ឋមន្ត្រី នាយឧត្តមសេនីយ៍ គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា កាលពីថ្ងៃទី២៦ ខែមករា ឆ្នាំ២០២២នេះ បានអញ្ជើញចុះត្រួតពិនិត្យស្ថានភាពជីវភាពរស់នៅ និងសំណេះសំណាលសាកសួរសុខទុក្ខបងប្អូនអតីតយុទ្ធជន ដែលកំពុងរស់នៅលើដីសម្បទានសង្គមកិច្ច ស្ថិតនៅក្នុងឃុំក្រយា ស្រុកសន្ទុក ខេត្តកំពង់ធំ ។
ឯកឧត្តមឧត្តមសេនីយ៍ទោ សោម ស៊ុន បានរាយការណ៍បញ្ជាក់ជូនថា ក្រោយពីបានទទួលការចាប់ឆ្នោតយកដី និងផ្ទះថ្មី ដែលជាអំណោយដ៏ថ្លៃថ្លារបស់សម្ដេចតេជោហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលមានអតីតយុទ្ធជន ចំនួន១៤១គ្រួសារ កាលពីខែ ឧសភា ឆ្នាំ២0២១កន្លងទៅនេះ បងប្អូនបានមករស់នៅកសាងជីវភាពថ្មីនៅលើផ្ទះថ្មី និងលើដីសម្បទានសង្គមកិច្ច ដោយក្នុងមួយគ្រួសារ ទួលបានចំនួន ១ហិកតាកន្លះ ហើយបានដាំដំណាំបង្កបង្កើនផល ចិញ្ចឹមសត្វ ដើម្បីដោះស្រាយជីវភាពគ្រួសារ។ មកដល់បច្ចុប្បន្ននេះ ភូមិអតីតយុទ្ធជន មិនទាន់មានផ្លូវ ទឹកស្អាត និងអគ្គិសនី សម្រាប់ប្រើប្រាស់នៅឡើយទេ។ នៅក្នុងរដូវវស្សាត្រូវបានជំនន់ទឹកភ្លៀង ជន់លិច បង្កឲ្យខូចខាតផលដំណាំរបស់បងប្អូនអតីតយុទ្ធជនមួយចំនួន។
នៅខណៈនោះផងដែរ ឯកឧត្ដម នាយឧត្តមសេនីយ៍ គន់ គីម បានកោតសរសើរដល់បងប្អូនអតីតយុទ្ធជនទាំងអស់ ដែលបានខិតខំបង្កបង្កើនផល ចិញ្ចឹមសត្វ ដោះស្រាយជីវភាពគ្រួសារ នៅលើផ្ទះថ្មីនិងដីសម្បទានសង្គមកិច្ច ដែលជាអំណោយដ៍ថ្លៃថ្លារបស់សម្ដេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងសម្តេចកិត្តិព្រឹទ្ធបណ្ឌិត បានផ្ដល់ជូន។
ឯកឧត្តមទេសរដ្ឋមន្ត្រីបានបញ្ជាក់ថា នៅពេលខាងមុខឆាប់ៗនេះ ឯកឧត្តមនឹងអញ្ជើញមកបើកការដ្ឋានសាងសង់ផ្លូវប្រវែង១២គីឡូម៉ែត្រ នៅក្នុងភូមិអតីតយុទ្ធជនយើង ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន ព្រមទាំងរៀបចំបណ្ដាញប្រព័ន្ធរំដោះទឹក និងប្រឡាយទឹក ជូនបងប្អូនក្រុមគ្រួសារអតីតយុទ្ធជន នៅលើដីសម្បទានសង្គមកិច្ចនៅឃុំក្រយា ស្រុកសន្ទុក ខេត្តកំពង់ធំនេះ ដើម្បីងាយស្រួលដល់បងប្អូនក្នុងការរស់នៅ។
ឯកឧត្តមទេសរដ្ឋមន្ត្រី គន់ គីម បានសំណូមពរដល់បងប្អូនក្រុមគ្រួសារអតីតយុទ្ធជនទាំងអស់ ត្រូវខិតខំថែរក្សាសុខភាព ពិសេសទៅចាក់ វ៉ាក់សាំងការពារជំងឺកូវីដ-១៩ ដូសទី៤ ដែលនឹងរៀបចំចាក់ជូនបងប្អូននៅពេលឆាប់ៗខាងមុខនេះ ឲ្យបានគ្រប់ៗគ្នា៕
