មន្ទីរសាធារណការ និងដឹកជញ្ជូនរាជធានី សហការជាមួយអាជ្ញាធរខណ្ឌ ធ្វើការស្តារប្រឡាយជាច្រើនខ្សែនៅក្នុងរាជធានីភ្នំពេញ

មន្ទីរសាធារណការ និងដឹកជញ្ជូនរាជធានីភ្នំពេញ បានសហការជាមួយអាជ្ញាធរខណ្ឌ ធ្វើការស្តារប្រឡាយជាច្រើនខ្សែនៅក្នុងរាជធានី ដើម្បីរំដោះការលិចលង់ភូមិឋានប្រជាពលរដ្ឋ ឱ្យបានទាន់ពេលវេលា ពិសេសនៅរដូវវស្សាឆ្នាំនេះ។

លោក ម៉ែន សុខខេន ប្រធានអង្គភាពលូទឹក បូមទឹក នៃមន្ទីរសាធារណការ និងដឹក ជញ្ជូនរាជធានីភ្នំពេញ បានឱ្យដឹងនៅថ្ងៃទី២៦ ខែមករា ឆ្នាំ២០២២នេះថា ប្រឡាយទឹកដែល ក្រុមការងារកំពុងស្តារនេះរួមមាន៖ ស្តារប្រឡាយទួលពង្រទី១ ជាប្រឡាយបេតុង មានទទឹង ៨ម៉ែត្រ ជម្រៅ២ម៉ែត្រ និងបណ្ដោយ៤៥៤៥ម៉ែត្រ ចាប់ពីភូមិព្រៃព្រីងខាងត្បូង ដល់បុរីជីប ម៉ុង។ ដាក់លូប្រអប់ទំហំ២,៦៥ម៉ែត្រ គុណនឹង ២,៦៥ម៉ែត្រ មានចំនួន៣ជួរប្រវែង៤៤៥ម៉ែត្រ ចាប់ពីបុរីជីបម៉ុងដល់ប្រឡាយបឹងហា។ ដាក់លូប្រអប់ស្របតាមផ្លូវជាតិលេខ៣ ទំហំ ៦ម៉ែត្រ គុណនឹង២ម៉ែត្រ មានប្រវែង១២២០ម៉ែត្រ ចាប់ពីបូរី Green Vill ដល់ដើមប្រឡាយទួលពង្រ និងដាក់លូជ្រុងចំណុចផ្លូវឆ្លងកាត់មានចំនួន៧កន្លែងផងដែរ។ ប្រឡាយទួលពង្រទី២ ស្ថិតនៅ ភូមិសាស្រ្តសង្កាត់ចោមចៅ២ និងចោមចៅទី១ ក្នុងខណ្ឌពោធិ៍សែនជយ័ ស្តារភក់ល្បប់ ប្រឡាយទួលពង្រ២ បានប្រវែង ៦,១០០ម៉ែត្រ។ ស្តារភក់ល្បប់ ប្រឡាយលូ៥ បានប្រវែង ៩៥០ម៉ែត្រ ដែលជាប្រឡាយដ៏សំខាន់ក្នុងការរំដោះទឹកក្នុងមូលដ្ឋានខណ្ឌពោធិ៍សែនជ័យ ,ខណ្ឌសែនសុខ និងខណ្ឌមានជ័យ ទម្លាក់ទៅប្រឡាយម័ល និងបន្តចុះទៅជើងឯក។ ការស្តារប្រឡាយស្ទឹងមានជ័យ ជាមួយនិងការបុកស៊ីផាយបេតុងជញ្ជាំងប្រឡាយ ហើយ ប្រឡាយនេះអាចបង្ហូរទឹកហូរបានយ៉ាងល្អ។

លោកបន្តថា ដោយឡែក ប្រឡាយបឹងទំពុន ដែលប្រវែង ៥០០ម៉ែត្រ និងមាន ទទឹង៣០ម៉ែត្រនោះ គឺក្រុមការងារបានការកាយស្មៅ និងសំរាមចេញ ប្រឡាយនេះ ព្រោះប្រឡាយនេះ មានតួនាទី យ៉ាងសំខាន់ក្នុងការរំដោះទឹកពីប្រឡាយដើមស្លែង ប្រឡាយបារាំង ពិសេសរំដោះទឹក ពីក្នុងខណ្ឌ ពោធិ៍សែនជ័យ ខណ្ឌសែនសុខ ខណ្ឌទួលគោក និងផ្នែកខ្លះក្នុងខណ្ឌចំការមន និងខណ្ឌ៧មករាផងដែរ៕